La ricurrenza di lu sbarco di Garibaldi
Oji è l’anniversariu di lu sbarcu di Garibaldi in Sicilia.
L’11 di maju di lu 1860 a Marsala accuminciò lu sbarcu di la spedizioni di li Milli di Giuseppi Garibaldi.
St’eventu rapprisenta pi la Sicilia l’iniziu d’un colonialìsimu accupusu e la fini di li tempi pròsperi, fèrtili e ricchi senza nicissità di prijari a nuddu signuri o liberaturi di turnu, giacchì chistu fu l’antefattu chi purtò a la proclamazioni di l’unità d’Italia.
Dopu aviri repressu la ribillioni di la Gancia, l’autorità di lu Regnu di li Dui Sicilî s’aspittàvanu lu sbarcu di “rivoluzionari” vinuti di fora. Li zoni unni avìssiru pututu arrivari èranu l’Abruzzi e la Sicilia.
La vicenna appi comu protagonisti puru li navi di l’Armata di Mari di li Dui Sicilî e dui navi di guerra di la Royal Navy britànnica.
Lu 14 di maju di lu 1860 a Salemi Garibaldi dichiarò d’èssiri addivintatu lu dittaturi di la Sicilia “pi cuntu di Vittoriu Emanueli, re d’Italia”.
Nuàutri semu stanchi di na storia fàusa chi pitta a Garibaldi comu ‘n eroi e non comu a un lordu pirata e approfittaturi.
Dopu di lu sbarcu accuminciò la formazioni di lu vrazzu armatu, o veru sìa la MAFIA, ca nni l’anni appressu lu Statu italianu utilizzò pi fari zìttiri a cu’ nun vulìa calari la testa.
Nuàutri, comu movimentu giuvanili di lu partitu indipendentista Siciliani Liberi, nun facemu nudda amminazza: nni li 200 anni di colonialìsimu italianu, supratuttu l’ùltimi, li Siciliani foru privati di troppi diritti; si un jornu lu pòpulu sicilianu s’addunassi di tutti li purcarìi subiti, li misfatti sunnu accussì gravi ca si putissi scatinari macari na guerra civili
AN.TU.DO
