La festa di li Morti
Lu primu di Nuvemmiru e lu jornu di Tutti li Santi m sunnu assai sintuti nta tutti li banni di la Sicilia. La festa di Tutti li Santi si radica nni li Celti, i quali fistïavanu l’accussì-dittu “abbentu di la natura”, unni la finaita ntra lu munni di li vivi e chiḍḍu di li morti si facìa chiù finu.
Li Morti esti na festa assai antica ca veni di lu dècimu seculu e si cunta ca li morti portanu rigali a li picciriḍḍi, l’accussì-dittu “cannistru.” Oji li jinitura accattanu li rigali a li soi figghî nni li feri, unni vìnninu jòcura e duci tìpichi comu l’ossa di mortu.Ci sunnu àutri duci tìpichi di manciari: si ponnu attruvari li pipateḍḍi, jinchiuti di mènnuli atturrati. Li taralli sunna na sorta di cuḍḍura cummigghjata cu lu zuccaru, li pipareḍḍi, viscotta missinisi cu li mènnuli, li nucatoli ca sunnu viscotti cu lu pruvulazzu di zuccaru ncapu, e li Tetù e Teju, i quali sunnu janchi marruni.
Tradizioni sulamenti palirmitana esti chiḍḍa di jùnciri na forma di pupi siciliani a li cannistri, e si chiamanu “cena a pupi” pi na liggenna d’un nobbili àrabbu ca cascau poviru e li uffrìu a li soi òspiti pi cumpinsari a lu manciari ca mancava. Sparti, s’attrova la muffuletta, un panuzzu nisciutu caudu di lu furnu e cunsata cu ogghju, sali, pipi, arrianu, anciovi e primusali.
La principali tradizioni nta tutti li banni di la Sicilia esti chiḍḍa di visitari a li morti, purtànnuci çiuri e prijannu. A Erici (Trapani) si cridi ca li morti nèscinu di lu Conventu di li Cappuccini, vannu a lassari li doni a li picciriḍḍi, e appoi arripusavanu nta na strata citadina prima d’agghicari a lu Cunventu, unni li picciriḍḍi ci lassavanu quarchi cosa di manciari. A Cianciana (Girgenti), putemu attruvari n’àutra tradizioni avali, unni li morti nèscinu di la Cresia di Sant’Antoniu di li Rifurmati. Nni Acirriali (Catania) li morti firrìanu cu lu sou linsolu di funirali p’arrubbàricci li doni a li vinnituri e dariccilli a li picciriḍḍi.
A Palermu, si cridìa ca li morti niscìanu di li cimmiteri pi juncìrisi tutti pari nta la zona di la Vuccirìa, unni si fa la celebbri Fera di li Morti, e di ḍḍocu partìanu pi purtàricci li rigali a li picciriḍḍi.
