Festa di lu 17 Aûstu di Sant’Àjita
La festa di lu 17 Aûstu di Sant’Àjita
Comu nuiàutri tutti sapemu, Sant’ Àjita è la patrona di Catania, e si dici ca esti la terza festa cristiana chiù mpurtanti di tuttu lu munnu, appresu a la Simana Santa di Sevigghja nta la Spagna, e a la Festa di lu Corpus Domini ‘n Guscu (Guzco), nta lu Perù. La festa ammisca storia, liggenni, miràculi, folclori e devuzioni.
La festa principali àvi locu ntra lu 3 e lu 6 di Frivaru, misi unni la Santa fu aggramignata di lu Pruconsoli Chinzianu chi tintau nta tutti li maneri di seducìrilla, pirò iḍḍa, forti nni la so’ fidi, lu sdignau e nun si lassau accanzari, e pi chissu fu martirizzata.
Pirò la Santa si fistija acari nta stati, nta lu misi di Aûstu. Si dici ca chista festa ca àvi la durata di na jurnata e chi àvi locu lu jornu 17 di Aûstu, ancora chiù antica di chiḍḍa di Frivaru è.
Nascìu spuntanea appressu a li eventi ca si àppiru nta la notti di lu 17 Aûstu di l’annu 1126, quannu li reliquî di la Santa catanisi arriturnaru a Catania di Custantinopoli arrubbati nta lu 1040 di lu Ginirali bizantinu Maniaci. Lu corpu di la Sant’ Àjituzza arricampau grazzi a li dui suldati Gilbertu e Goselmu, a li quali ci cumparìu Sant’ Àjita addamenti stavanu nsunnannu.
La festa si sbrugghja nta na manera chjù arriduciuta cumparata a chiḍḍa di Frivaru, attrajennu ammeri lu centru stòricu migghjara di devoti, turisti e genti curiusa.
Pi di chiù a la missa didicata a Sant’ Àjita, ammeri la menzasira àvi locu na curta prucissioni cu lu scrignu unni ci càpinu li riliquî e lu menzubustu, ca furrìa ntunnu a la Cattidrali, nna “Via Dusmet” e a-gjri la “Chiazza San Placidu” e di poi arriturnannu n’àutra vota dintra la cresia a traversu “Via Vittoriu Manueli” cu li straurdinari jòcura di focu e di muschittarìa, nta na zona risirvata a lu Portu di Catania, e na cosa multu ntirissanti, ncapu a lu dammusu di la cresia di San Placidu.
