Catania senza luci e acqua
Un fattu ca ni sta ntirissannu nta chisti jorna è chiḍḍu ca cuncerni la citati di Catania, nta la Sicilia di l’Est: pi tri jorna (19 di giugnettu – 21 di giugnettu) ci foru mancamentu di currenti elèttrica e scarsizza d’acqua nta li casi di li Catanisi e di li paìsi di lìmitu-emmènzu.
Secunnu quarchi nota di Sidra (l’assuciazioni ca si duna versu pi premurari lu surbizziu ìdricu a la majuri citati ettinea) i Enel, lu malu surbizzu veni di li giniraturi di currenti elèttrica ca svamparu pi causa di la forti calura ca si appi nta chisti jorna, e chi ancora oji cuntinua a fari danni. Tanti foru li cristiani ca si lamintaru e si bummuliaru di lu malu surbizziu, picchì comu dissiru certuni di iḍḍi: “Ci sunnu rìsichi pi la saluti, chissu nun pò addivintari na cosa nurmali, supratuttu nta stati, unni nta certi lòcura lu termòmetru facìa chjù di 40 gradi Celsius.” E puru -vulissimu jùnciri nuiàutri- quannu si pàganu bullittuni di luci àuti nzinu a li stiḍḍi.
Pi attruvari na soluzioni a chissu prublema, lu sìnnacu di Catania, Enricu Trantinu si juncìu a nu ncontru nta la jurnata di venniriddìa 21 di giugnettu 2023 ammeri l’1:30 di lu jornu, nsemmula a li soi cullaburaturi pi travagghjari ncapu a lu malu surbizziu, e pi attruvari la megghju soluzioni.Pirrimpimpìu, li justificazioni ca foru dati a li citadini nun stannu ni nto celu, e accussì mancu nta terra: lu malu surbizziu di currenti elèttrica vinissi di nu supracarricu di cunsumi, dànnuci la curpa a li cunsumaturi, e chissu nun pò èssiri accittatu nta tutti li maneri possìbbili.
Nuiàutri semu d’accordu cu lu pòpulu catanisi, picchì la riti elèttrica avissi a aviri la forza di mpunìrisi li màssimi carrichi produciuti di li cristiani a li quali ci aggiovanu surbizzi di chistu tipu, essennu ca vìvunu nta li zoni sempri chjù caudi nta stati, s’annunca la riti elèttrica efficenti nun è.
