Autonomia diffirinziata
L’autonomìa diffirinziata di li regiuni di lu Nord cunsisti nni la trattinuta di li principali imposti (Irpef, Ires e Iva) chi nun vannu chiù a lu Statu ma a li regiuni unni st’imposta veni pagata. In teorìa nun ci fussi nenti di malu si li regiuni si pigghiàssiru na pocu di funzioni e si facìssiru dari li funni pinsannu di putilli fari funzionari megghiu.
La questioni è ca pigghiànnusi sti funzioni – e nsina cca nun semu cuntrarî – nun vonnu fàrilu sulu cu lu fruttu di l’incassi di l’attività fatti in Lumbardìa, Vènetu, Emilia-Rumagna o nta àutri regiuni di lu Nord ma puru cu chiddi fatti nta lu Sud e nta l’ìsuli; pi fari ‘n esempiu, lu jèttitu di na ‘mprisa cu sedi a Milanu e chi havi na filiali a Palermu, avissi a ristari in Sicilia secunnu l’art. 37 di lu Statutu Sicilianu ma, ssennu in Lumbardìa la sedi legali, stu jèttitu fiscali veni rivinnicatu di la stissa regiuni comu si fussi tuttu fruttu di attività fatti nni lu territoriu lumbardu.
Quinni, scupreru comu mpiurari lu colonialìsimu internu, spaccannu definitivamenti l’Italia, cosa ca nun fussi malu ma, lassànnula unita puliticamenti, succedi ca li regiuni di lu Sud, la Sicilia e la Sardigna addivèntanu ufficialmenti colonî senza chiù diritti. Chissu signìfica nàutru latruciniu futuru chi mpiurarà li servizi sanitari, li trasporti e tutta la qualità di la vita cu la cumplicità di tutti li partiti taliani.
È inùtili dumannari a li rapprisintanti in Sicilia di li partiti taliani di fari rispittari li diritti di li Siciliani picchì già in campagna elettorali fìciru promissi ca non foru rispittati, tràttanu la Sicilia comu na terra coloniali unni ingannari lu pòpulu pi li suli fini elettorali.
Giuvintú Siciliana Lìbira lutta ideologicamenti e fisicamenti affinchì li diritti costituzionali, sociali e pulìtici di li Siciliani sianu rispittati.
