741MU Anniversariu Di Lu Vèspiru!
Ajeri in Sicilia fu festa nazionali: ricurrìu lu 741mu anniversariu di lu Vèspiru.
Alcuni la cèlebranu oji, 31 di marzu, picchì tannu lu novu jornu accuminciava giustu dopu la calata di lu suli, ma sta ribillioni iniziò a Palermu a l’ura di lu vèspiru di un lunidìa di Pasqua e nni lu1282 lu 30 marzu era propiu lùnniri.
L’obiettivu di sti moti èranu l’occupanti francisi di l’isula, l’Angiuini, pirciputi comu oppressuri straneri.
Di Palermu la ribillioni si diffunnìu subitu a tutta la Sicilia e li francisi foru ammazzati o jitatti fora.
Dopu la morti di l’imperaturi Curradu IV, la scunfitta di Manfredi a Beneventu e la decapitazioni a Nàpuli lu 29 d’ottubri di lu 1268 di l’ùltimu pretennenti svevu Curradinu, lu Regnu di Sicilia avìa statu suttamisu definitivamenti a lu suvranu francisi Carlu I d’Angiò. Lu papa Clementi IV, chi lu 6 di innaru di lu 1266 avia già ‘ncurunatu a Carlu Re di Sicilia, sperannu accussì di putiri estènniri la so ‘nfluenza nta l’Italia meridiunali senza aviri a subiri li veti imposti prima di li Svevi, pinsò ca l’Angiuini avìssiru perseguitatu na pulìtica espansionista aggressiva: avennu cunquistatu lu sud di l’Italia, l’obiettivi di Carlu taliàvanu a Orienti e a l’Imperu Bizantinu appena risturatu.
In Sicilia la situazioni avìa addivintatu particularmenti crìtica a càusa di na riduzioni generali di li libertà barunali e, supratuttu, a càusa di na pulìtica fiscali oppressiva.
Li nòbili siciliani e in particulari lu diplomàticu Giuvanni da Pròcida, mìsiru li so speranzi in Micheli VIII Paleologu, imperaturi bizantinu già in cuntrastu cu Carlu I d’Angiò, in Papa Nicolau III, chi s’avìa addimustratu dispostu a mediari, e in Petru III d’Araguna.
Lu Vèspiru rapprisenta na tappa fundamentali di la storia siciliana: nni stu cuntestu nascìu lu longu ligami ntra Sicilia e Araguna, chi chiù avanti purtau a l’inclusioni di l’ìsula nta lu regnu unitu a la fini di lu XVmu sèculu.
Giuvintú Siciliana Lìbira voli ricurdari stu jornu tristu ma puru vitturiusu picchì rapprisenta na Sicilia chi non si ferma davanti a nenti e a nuddu, ma lutta pi la so autodeterminazioni.
